تدريب الكلب على مكان قضاء الحاجة


تدريب الكلب على مكان عمل البى البى الحمام
تدريب الكلب على مكان عمل البى البى الحمام


طبعا أكتر حاجة بيعاني منها أي حد بيربي كلب في بيته هو مكان قضاء الحاجة، خصوصا ان الكلاب مزعجة جدا في الموضوع ده على عكس القطط، وأحب انبه على حاجة ان

مفتاح الموضوع ده هو الصبر والصبر ولا شيء غير الصبر. ولتعويد الكلب على قضاء حاجته في الحمام أو في مكان معين مكن نتبع كذا طريقه بس من خلال تجاربي لأني طول عمري كلابي عايشه في البيت وعمري ما ربيت كلب بره البيت بحب اجمع الطرق كلها في طريقة واحده والحمد لله اثبتت نجاحها مع كل الكلاب حتى مع العنيد منها، وبسم الله نبتدي الأول بشوية معلومات ضروريه عن فسيولوجيا الكلاب قبل مناقشة الطرق.
الكلاب يا جماعة لغاية عمر 3 أو 4 شهور مش بتقدر تتحكم في عضلات المثانه أو المستقيم، يعني ببساطه الكلب أول ما بيحس انه محتاج يعمل حمام بيعملها مكانه حتى لو كان بياكل ومش بيقدر يمسك نفسه، ودي نقطه مهمة جدا لان ناس كتير متوقعه ان الكلب علشان شكله كبير -خصوصا مع الكلاب زي الجيرمن- يبقى خلاص لازم يروح الحمام ولو معملش واستجاب للتدريب يبقى غبي، طبعا ده مفهوم خاطئ جدا. ولازم نحط الكلام ده في اعتبارنا قبل اي تدريب.
الكلام ده ميمنعش اننا نعود الجرو من اول يوم ليه في البيت على الحمام، لكن منتوقعش استجابه سريعه الا بداية من عمر 4 شهور أو 5 شهور، وحتى في كلاب بتوصل لسن 6 شهور ولسه ماتعلمتش، ودي كلها متقلقش حد.تدريب الكلب على مكان عمل البى البى الحمام



حاجة تانيه لازم نعرفها، ان الكلب بيعمل حمام بعد الاكل بفتره تتراوح من 10 ل 30 دقيقه وبيعمل حمام بعد مده من اللعب تستمر 15 ل 30 دقيقه، يعني نتوقع لو لعبنا مع الكلب مده 15 دقيقه انه هيعمل حمام، وعلامات احتياج الكلب لقضاء الحاجة انه تلاقيه بيشمشم في الارض بحركات دائريه وبعدين يقف في مكانه ويبتدي يعمل الحمام. وكمان الكلب اول ما بيصحى من النوم بيعمل حمام وغالبا بيكون بول، ودي حاجة مهمة بردو لازم تكون في بالنا.

في حاجة بقى مهمة، الكلاب لما بتبتدي تتحكم في المثانه هنلاحظ حاجة غريبه شويه، ان الكلب ممكن تلاقيه وهو بيلعب او بيتحرك بينزل نقط من البول، ده طبيعي ومش مقلق خالص لانه بيكون عايز يعمل حمام وبيحاول يمسك نفسه، لو عمل كده مش نقلق خالص ولا ناخده على الحمام في ساعتها، بالعكس نسيبه شويه علشان ننمي جواه الموضوع ده، وبعدين ناخده على الحمام، علشان يتعود يمسك نفسه كويس.

طبعا نفس الكلام ده هنطبقه لو عايزين الكلب يعلمها بره البيت، بدل ما ناخده الحمام هناخده بره البيت، يعني انا مثلا الكلب بتاعي طول ماحنا في البيت بيعمل في الحمام بدون مشاكل، واول ما نخرج متعود يعملها في الشارع قبل ما نركب العربيه، وبردو بيعمل حمام في الشارع قبل ما نطلع، هو الموضوع موضوع صبر ومثابره لا اكثر ولا اقل.

6 التعليقات:

  1. Anonymous يقول...:

    أزال أحد مشرفي المدونة هذا التعليق.

  1. Fadi Salah يقول...:

    انا عندى جيرمن شيبرد 4 شهور نتاية بس مغلبانى فى الموضوع دة انا حاططلها صاج علية رملة فى البلكونة و دة المفروض مكانها مع العلم انها بلكونة كبيرة و دى عاملها بيتها فيها من الناحية التانية ... و ممرمطانى بجد

  1. New Life يقول...:

    لازم تتعب مع الكلب و لو هو كبير ممكن يتعبك كتير خالص :)

إرسال تعليق